अजितदादांच्या एंट्रीचा थेट फटका; वादात भाजपने साधली संधी, दादा भुसेंचं पालकमंत्रिपद जाणार?

नाशिक जिल्ह्यात भाजपची ताकद असतानाही शिंदे-फडणवीस सरकारमध्ये पालकमंत्रिपद शिंदे गटाकडे गेले होते. त्यावरून भाजपमध्येही नाराजी होती. त्यात नुकत्याच झालेल्या मंत्रिमंडळ विस्तारात दादा भुसे यांच्याकडील बंदरे विकास व खनिकर्म असे दुय्यम दर्जाचे खाते काढून घेत मुख्यमंत्री एकनाथ शिंदे यांनी त्यांच्याकडे सार्वजनिक बांधकामसारखे वजनदार खाते दिले होते. त्यामुळे नाशिकचे पालकमंत्रिपद छगन भुजबळ यांना मिळणार अशी चर्चा सुरू झाली होती. परंतु, शिंदे गटाने ही चर्चा फेटाळून लावली होती. परंतु, गुरुवारी राज्य सरकारने स्वांतत्र्य दिनानिमित्त जिल्हा मुख्यालयात ध्वजवंदन करणाऱ्या मंत्र्यांची नावे जाहीर केली. त्यात नाशिक मुख्यालयात ध्वजवंदन करण्याचा मान पालकमंत्री भुसेंऐवजी गिरीश महाजन यांना देण्यात आला आहे. पालकमंत्री भुसे असताना महाजन यांना ध्वजवंदनाचा मान दिल्याने पालकमंत्रिपद बदलाच्या चर्चेला पुन्हा उधाण आले आहे. शिंदे गटाने मात्र हा आदेश ध्वजवंदनापुरताच मर्यादित असल्याचा दावा केला आहे.

शिवसेना-राष्ट्रवादी भांडणात भाजपचा लाभ?

नाशिकचे पालकमंत्री असतानाही दादा भुसे यांना ध्वजवंदनासाठी धुळे जिल्हा देण्यात आला आहे. छगन भुजबळ यांना थेट अमरावती जिल्ह्याची जबाबदारी देण्यात आली आहे. त्यामुळे शिवसेनेचा शिंदे गट आणि राष्ट्रवादीच्या संघर्षात आता नाशिकचे पालकमंत्रिपद पुन्हा भाजपकडे येणार, अशी चर्चा सुरू झाली आहे. अजित पवारांच्या ‘एंट्री’मुळे आधीच शिंदे गट अस्वस्थ आहे. त्यात पुन्हा पालकमंत्रिपदावरून फेरबदल झाल्यास भाजप आणि शिंदे गटाचे संबंध ताणले जाण्याची चिन्हे आहेत.