गुप्त बैठकीत भाजपचं ठरलं! गोळीबारावरुन पेटलेला वाद टोकाला; शिंदे होमग्राऊंडवरच अडचणीत?

कल्याण: भाजप आमदार गणपत गायकवाड गोळीबार प्रकरणामुळे राजकारण ढवळून निघाले आहे. या वादामुळे कल्याण लोकसभा मतदारसंघात भाजप आणि शिवसेना शिंदे गट यांच्यातील वाद आणि भाजपमध्ये शिंदेंविरोधात असलेली नाराजी पुन्हा एकदा उफाळून आली आहे. एकीकडे शिवसेनेकडून महेश गायकवाड यांच्या समर्थनार्थ शहरात बॅनर लावले जात आहेत. तर दुसरीकडे भाजप पदाधिकाऱ्यांची कल्याणमध्ये बैठक पार पडली आहे. आमदार गणपत गायकवाड यांना पाठिंबा देऊन त्यांच्या कुटुंबियांच्या पाठिशी ठाम उभे राहायची भूमिका या बैठकीत घेण्यात आल्याची जोरदार चर्चा आहे. पक्षाकडून राबवण्यात येणाऱ्या कार्यक्रमाच्या बॅनरवर शिंदेंसह शिवसेना नेत्यांचे फोटो न लावण्याचा निर्णयदेखील घेण्यात आला आहे. यामुळे आता शिवसेना व भाजप यांच्यातील हा वाद कोणतं राजकीय वळण घेतो हे आता पहावे लागेल.

भाजप आमदार गणपत गायकवाड यांनी जमिनीच्या वादातून उल्हासनगर हिल लाईन पोलीस ठाण्यात शिवसेना शहरप्रमुख महेश गायकवाड यांच्यावर गोळीबार केल्याची धक्कादायक घटना गेल्या आठवड्यात घडली. या घटनेनंतर राजकीय वर्तुळात एकच खळबळ उडाली. या घटनेला जमिनीचा वाद कारणीभूत ठरला असला तरी याचे मूळ खूप आधीपासून रुजले होते हे उघड आहे. राज्यात भाजप शिवसेना युती असली तरी कल्याण लोकसभा मतदारसंघात भाजप विरुद्ध सेना असेच वातावरण राहिले आहे. भाजप नेते, पदाधिकारी यांना शिवसेनेकडून सहकार्य मिळत नव्हते. त्यांना आडकाठी केली जात होती अशी खदखद यापूर्वी भाजपचे नेते, पदाधिकारी यांनी वरिष्ठांकडे अनेकदा व्यक्त केली आहे.
Ajit Pawar : तुमच्यात धमक असेल तर काढा ना पक्ष, कुणी अडवलं होतं? अजितदादांचा जुना व्हिडिओ, मनसेने डिवचलं
मानपाडा पोलीस ठाण्यात भाजप पदाधिकाऱ्यावर गुन्हा दाखल झाला आणि भाजपमधील खदखद बाहेर पडली. मानपाडा पोलीस ठाण्यातील वरिष्ठ पोलीस निरीक्षकांची बदली करा अन्यथा शिवसेनेला सहकार्य न करण्याची भूमिका त्यावेळी सार्वजनिक बांधकाम मंत्री रविंद्र चव्हाण यांच्यासह भाजप आमदार, पदाधिकाऱ्यांनी घेतली आणि तसा ठरावही केला. यावर मुख्यमंत्री एकनाथ शिंदे यांचे सुपुत्र व कल्याण लोकसभेचे खासदार डॉ. श्रीकांत शिंदे हे पदाचा राजीनामा देण्यास तयार झाले होते. यानंतर यात वरिष्ठांनी मध्यस्थी करत हे प्रकरण थंड केले होते. मात्र या भूमिकेवर स्थानिक पातळीवरील पदाधिकारी खूश नसल्याचे बोलले जात होते.
बैलजोडी, गाय वासरु, पंजा न् चरखा; पवारांना होती ‘घड्याळ’ जाण्याची कल्पना; मुंबईत काय घडलेलं?
कल्याण पूर्वेत भाजप आमदार गणपत गायकवाड व शिवसेना शिंदे गटाचे शहर प्रमुख महेश गायकवाड यांच्यात सातत्याने वादाच्या ठिणग्या उडत होत्या. रस्त्यांची कामं, विकास निधी ते पार गटाराच्या झाकणांपर्यंत हा वाद दिसून आला. दोघांनी रस्त्यावर उतरत एकमेकांना आव्हान दिले होते. त्यावेळी देखील तो वाद काहीसा निवळला. मात्र द्वारली येथील जमिनीचा वाद झाला आणि या वादाने टोक गाठले. आमदार गायकवाड यांनी थेट महेश यांच्यावर गोळी झाडली.

आमदार गणपत गायकवाड हे पोलीस कोठडीत आहेत तर महेश गायकवाड यांच्यावर ठाणे येथील रुग्णालयात उपचार सुरू आहेत. दोन्ही नेते हे ठाण्यात असले तरी कल्याण लोकसभेत मात्र राजकीय वातावरण तापले आहे. सोशल मीडियावर दोघांच्या समर्थकांकडून सोशल मीडियावर सोशल वॉर सुरू आहे. महेश यांच्या समर्थनार्थ शहरात बॅनरबाजी करण्यात आली आहे. हल्ल्याचा निषेध करत हल्ला करणाऱ्यांचादेखील शिवसेना समर्थकांनी जाहीर निषेध केला आहे. तर दुसरीकडे भाजप पदाधिकारी आमदार गायकवाड यांच्या समर्थनार्थ एकत्र आल्याचे बोलले जात आहे.