सराफा व्यावसायिकाला चाकूचा धाक दाखवून मारहाण, साडे बारा लाखांचे दागिने लंपास

मात्र, दोन दुचाकीवरून चोरटे पळून गेले. या घटनेची माहिती पोलिसांना तब्बल दोन तासांनी मिळाली. त्यानंतर पोलिस निरीक्षक अविनाश आघाव, दुय्यम निरीक्षक गणेश ताठे, उपनिरीक्षक अशोक इंगोले, सचिन पागोटे, संदीप शिंदे, अंमलदार सुरेश कचे, सूरज अग्रवाल, राजाभाऊ कोल्हे, अविनाश ढगे आदींनी घटनास्थळी जाऊन पाहणी केली. या प्रकरणी वाळूज ‘एमआयडीसी’ पोलिस ठाण्यात गुन्हा दाखल करण्यात आला असून, पुढील तपास सहायक पोलिस निरीक्षक गौतम वावळे करीत आहेत.

२) आधुनिक उपकरणांची ‘आरटीओ’कडून मागणी, स्पीडगन वाढवणार वेग

म. टा. प्रतिनिधी, छत्रपती संभाजीनगर : समृद्धी महामार्गाचे लोकार्पण झालेले आहे. या मार्गावर अपघातही घडत आहेत. या अपघाताची मालिका थांबविण्यासाठी विविध प्रयोग राबविण्यात येत आहेत; मात्र या महामार्गावर निश्चित केलेल्या वेगापेक्षा अधिक वेगाने वाहने चालविण्यात येत आहे. या वाहनांवर कारवाई करण्यासाठी आरटीओ विभागाकडे एकही आधुनिक स्पीडगन असलेले वाहन नसल्याची माहिती समोर आली आहे. सध्या असलेली स्पीडगनची वाहने ही मध्यम वेगाच्या वाहनांसाठी असल्याने हायवे किंवा शहराकडे येणाऱ्या वाहनधारकांवर या माध्यमातून कारवाई करण्यात येत आहे.

छत्रपती संभाजीनगर आरटीओ विभागाकडे शासनाने स्पीड गन असलेली तीन वाहने दिलेली आहेत. ही स्पीड गनची वाहने वाळूज रोडकडे जाणाऱ्या रस्त्यावर, सोलापूर-धुळे महामार्गासह जिल्ह्यातील अन्य मार्गावर वेगात चालणाऱ्या वाहनधारकांवर कारवाई करण्यासाठी लावण्यात आलेल्या आहेत. या स्पीड गनच्या माध्यमातून प्रतितास ८० ते ११० किलोमीटर या वेगात येणाऱ्या वाहनांवर कारवाई करण्यात येत असते. या वेगमर्यादा असलेल्या वाहने स्पीड गन असलेल्या वाहनांमधून टिपता येत असतात.

या स्पीडगन मधील तंत्रज्ञान हे ११० ते १५० किंवा १६० किलोमिटर प्रतितास चालणाऱ्या वाहनांचा वेग मोजू शकतात. मात्र, या वाहनांचा चांगला फोटो काढता येत नसल्याचा प्रकार समोर आला आहे. आरटीओ विभागाने समृद्धी महामार्गावर वेगात जाणाऱ्या वाहनांवर कारवाईसाठी या स्पीड गनचा उपयोग केला. मात्र, नीट फोटो काढता येत नसल्याचा प्रकार समोर आला आहे. यामुळे समृद्धी महामार्गावर वेगात चालणाऱ्या गाड्यांवर आरटीओ विभागाकडून ओव्हरस्पीडची कारवाई सध्या शक्य नसल्याचीही माहिती समोर आली आहे.

समृद्धी महामार्गावरील प्रयोग

समृद्धी महामार्गावरून जाणाऱ्या वाहनांचा वेग मोजण्यासाठी यंत्र नसल्याने, अशा वाहनांवर कारवाईसाठी दुसरा उपाय आमलात आणला जात आहे. यात ज्या ठिकाणी वाहन समृद्धी महामार्गावर येत आहे. त्या मार्गावरून ते सदर वाहन समृद्धी महामार्गाच्या खाली उतरते. या दरम्यान झालेले किलोमिटर आणि वेळ असा हिशोब लावण्यात येत आहे. अशा वाहनधारकांचे समुपदेशन केले जाते. तर काही वेळेस अशा वाहनधारकांवर दंडात्मक कारवाई करण्यात येत आहे.

आधुनिक स्पीड गनची मागणी

समृद्धी शिवाय राज्यातील विविध भागात एक्सप्रेस हायवे वाढलेले आहेत. अशा वाहनांवर कारवाई करण्यासाठी आरटीओ विभागाकडून आधुनिक स्पीड गन असलेल्या वाहनांची मागणी केली जात आहे, अशीही माहिती आरटीओ सूत्रांनी दिली.

३) सफरचंदावरून तरूणाला मारहाण, मारहाण करणाऱ्या विक्रेत्यांच्या विरोधात गुन्हा

छत्रपती संभाजीनगर : ओळखीचा फळ गाडीवाल्याच्या हातगाडीवरून एक सफरचंद खाणे तरुणाला महागात पडले. फुकटचा सफरचंद खाल्ला म्हणून फळगाडी विक्रेत्याने आधी शिवीगाळ केली. त्यानंतर तीन ते चार जणांनी मारहाण केली. या प्रकरणी मारहाण करणाऱ्या विक्रेत्यांच्या विरोधात एमआयडीसी सिडको पोलिस ठाण्यात गुन्हा दाखल करण्यात आला आहे.

या प्रकरणी आर्यन साहेबराव हिवाळे (वय १७, रा. संजयनगर, गल्ली नंबर २) याने दिलेल्या तक्रारीनुसार, ७ ऑगस्ट रोजी रात्री ९ वाजेच्या दरम्यान लाईफ हॉस्पीटल समोर आर्यन याच्या ओळखीचा फळगाडीवाला उभा होता. आर्यन याने त्याला विचारून एक सफरचंद खाल्ला, त्यानंतर आर्यन हा घरी जाण्यासाठी निघाला. आर्यन घरी निघत असताना फळगाडीवाल्याने फुकट खातो का, पैसे दे असे सांगत, शिवीगाळ सुरू केली. यावर आर्यनने त्याला शिविगाळ करू नको, असे सांगितले. त्यानंतर फळविक्रेता आणि त्याच्या तीन साथीदारांनी आर्यनला मारहाण केली. या प्रकरणी आर्यर हिवाळे याच्या तक्रारीवरून मारहाण करणाऱ्या फळगाडीवाल्यासह अन्य तिघांच्या विरोधात एमआयडीसी सिडको पोलिस ठाण्यात गुन्हा दाखल करण्यात आला आहे.