[ad_1]
दरम्यान, विधानसभेचे उपाध्यक्ष आणि दिंडोरीचे आमदार नरहरी झिरवाळ यांनी छगन भुजबळ यांना नाशिक मधील वारकरी संप्रदायाच्या कार्यक्रमात वारकरी परंपरेनुसार लोटांगण घालून नमस्कार केला. झिरवाळ यांनी लोटांगण घालत काय आशीर्वाद मागितला आणि भुजबळांनी नेमका काय आशीर्वाद दिला याची चर्चा सध्या राजकीय वर्तुळात सुरू झाली आहे. तसेच व्यासपीठावर उपस्थित काही प्रमुख वारकरी संप्रदायातील लोकांसमोरही झिरवाळ यांनी नतमस्तक होत चरणस्पर्श केले.
श्रीमंत जगद्गुरू श्री संत तुकाराम महाराज जनसेवा प्रतिष्ठानतर्फे रविवारी शहरातील श्रद्धा लॉन्स येथे ‘अभंग पंचविशी’ प्रकाशन सोहळा व ग्रंथदान सोहळा पार पडला. संत तुकारामांच्या निवडक २५ अभंगांचा संग्रह असलेल्या ‘अभंग पंचविशी’चे प्रकाशन करण्यात आले. ‘वारी आपल्या दारी, श्री संत तुकाराम समर्थ गाथा घरोघरी’ या उपक्रमाच्या माध्यमातून हा सोहळा पार पडला. यासाठी विधानसभेचे उपाध्यक्ष नरहरी झिरवाळ, अन्न व नागरी पुरवठा व ग्राहक संरक्षण मंत्री छगन भुजबळ, आमदार ॲड. माणिकराव कोकाटे यांच्यासह वारकरी संप्रदायातील नागरिक उपस्थित होते.
या कार्यक्रमाप्रसंगी मंत्री भुजबळ म्हणाले, संत तुकारामांचे अभंग बुडवण्याचे अनेक प्रयत्न झाले. पण संतांचे विचार कधीही संपत नाहीत. संत तुकारामांनी रचलेले अभंग हे कधीही न भंगणारे आहेत. अंधश्रद्धेला त्यांनी कधीही खतपाणी घातले नाही. पण देवाप्रती आपली श्रद्धा असायला हवी, अशी शिकवण त्यांनी दिली. असे विधान यावेळी मंत्री भुजबळ यांनी केले. मात्र या ठिकाणी झिरवळ यांनी मंत्री भुजबळ यांच्या समोर घातलेले लोटांगण चर्चेचा विषय ठरला.
[ad_2]
Source link