ना मोदी ना शाह, फडणवीस बावनकुळेंच्या उपस्थितीत अशोक चव्हाण भाजपमध्ये? आजच प्रवेश,कारण समोर

अशोक चव्हाण यांना भाजपकडून राज्यसभेवर संधी दिली जाण्याची शक्यता आहे. राज्यसभा निवडणुकीसाठी अर्ज दाखल करण्याची अंतिम मुदत १५ फेब्रुवारी आहे. त्यामुळं बड्या नेत्याच्या उपस्थितीऐवजी महाराष्ट्रातील भाजप नेत्यांच्या उपस्थितीत हा प्रवेश होणार आहे. अशोक चव्हाण यांची अमित शाह यांच्या उपस्थितीत पक्ष प्रवेश व्हावा, अशी इच्छा होती. मात्र, आजच अशोक चव्हाण यांचा पक्ष प्रवेश होऊ शकतो.

अशोक चव्हाण यांना राज्यसभा मिळणार?

अशोक चव्हाण यांनी काल सकाळी त्यांच्या आमदारकीचा राजीनामा दिलेला होता. त्यानंतर त्यांनी काँग्रेसच्या प्राथमिक सदस्यत्वाचा राजीनामा दिला होता. चव्हाण यांनी काल बोलताना दोन दिवसांचा वेळ घेऊन ठरवणार असल्याचं म्हटलं होतं. मात्र, राज्यसभा निवडणुकीची प्रक्रिया सुरु असल्यानं लवकरच पक्ष प्रवेश होणार आहे. भाजप राज्यसभेवर तीन जणांना महाराष्ट्रातून पाठवू शकतं. त्यापैकी एका जागेवर अशोक चव्हाण यांना संधी मिळणार असल्याच्या चर्चा आहेत.

नांदेडमध्ये काँग्रेसला फटका बसणार?

नांदेड जिल्ह्यात अशोक चव्हाण म्हणजेच काँग्रेस आणि काँग्रेस म्हणजेच अशोक चव्हाण असं समीकरण होतं. त्यामुळं अशोक चव्हाण भाजपमध्ये गेल्यास नांदेड जिल्ह्यात काँग्रेसचं अस्तित्वाला धक्का लागू शकतो, अशी शक्यता आहे.

अशोक चव्हाण यांचा राजीनामा, काँग्रेसमध्ये निवडणुकीला ब्रेक

महाराष्ट्र प्रदेश काँग्रेसच्या पक्षांतर्गत निवडणुकांचा कार्यक्रम जाहीर करण्यात आला होता. पक्षाच्या विविध जबाबदाऱ्या अशोक चव्हाणांकडे असल्यानं सध्या पक्षातील निवडणुकांना ब्रेक लावण्यात आला आहे. अशोक चव्हाण यांच्या राजीनाम्यानंतर विदर्भ आणि मराठवाड्यात नुकसान होऊ नये म्हणून डॅमेज कंट्रोल करण्यात काँग्रेसला यश येतं का ते पाहावं लागणार आहे.