मुंबई: न्यूझीलंडचा क्रिकेटपटू रचिन रविंद्र मूळचा भारतीय आहे. आयसीसी एकदिवसीय विश्वचषक स्पर्धेत रचिन रविंद्र तुफान फॉर्मात आहेत. ८ सामन्यांत त्याच्या नावावर ५२३ धावा आहेत. त्यात ३ शतकांचा समावेश आहे. यादरम्यान सोशल मीडियावर त्याच्याबद्दलच्या पोस्ट व्हायरल होत आहेत. जातीभेदामुळे तीन वर्षांपूर्वी रचिनला भारत सोडावा लागला, असा दावा व्हायरल पोस्टमध्ये करण्यात आला आहे.

व्हायरल पोस्टमधील दावा काय?
‘ब्राह्मण रत्न रचिन रविंद्र कृष्णमूर्तीचं पाकिस्तानविरुद्ध शतक. विश्वचषकात आतापर्यंत ५०० हून अधिक धावा, ३ शतकं, ३ अर्धशतकं, ८ विकेट्स. भविष्यातील क्रिकेटचा सुपरस्टार. बरं झालं तू ३ वर्षांपूर्वी भारत सोडलास. कारण इथे तुझी जात पाहून ब्राह्मणवादचा टॅ लावला गेला असता. नका खेळवू म्हटलं गेलं असतं. आज त्याचं बंगळुरुत, जिथल्या जातीय भेदभावाला कंटाळून रविंद्रनं भारत सोडला, त्याच जमिनीवर त्यानं पाकिस्तानविरुद्ध शतक झळकावलं,’ असा दावा व्हायरल पोस्टमध्ये करण्यात आला आहे. व्हायरल पोस्ट अनेकांनी शेअर केली आहे.

खरं काय? खोटं काय?
दाव्यातील सत्यता पडताळून पाहण्यासाठी न्यूझीलंड क्रिकेट बोर्डचं अधिकृत संकेतस्थळ तपासलं असता तिथे महत्त्वाची माहिती मिळाली. खेळांना प्रोत्साहन देण्यासाठी न्यूझीलंडमध्ये एक संस्था कार्यरत आहे. न्यूझीलंड कम्युनिटी ट्रस्ट असं तिचं नाव. ही संस्था शाळांमध्ये सांघिक स्पर्धा आयोजित करते. न्यूझीलंड क्रिकेट बोर्डच्या संकेतस्थळावरील माहितीनुसार, २०१४ मध्ये रचिन रविंद्रनं हट इंटरनॅशनल बॉईज स्कूलकडून खेळताना नाबाद ९८ धावा केल्या होत्या. हा सामना उत्तर न्यूझीलंडमधील पामर्स्टनमध्ये खेळवण्यात आला होता.

रचिन रविंद्र ७ वर्षांपासून न्यूझीलंडमध्ये खेळत असल्याची माहिती उपलब्ध आहे. न्यूझीलंड क्रिकेट बोर्डच्या संकेतस्थळावरील माहितीनुसार, एचआयबीएसकडून सलामीला येणाऱ्या आणि डावखुरी गोलंदाजी करणाऱ्या रचिनला २०१६ मध्ये न्यूझीलंड क्रिकेटकडून यंग प्लेयर ऑफ द ईयर पुरस्कार देण्यात आला. बांग्लादेशमध्ये खेळवण्यात आलेल्या आयसीसी १९ वर्षांखालील विश्वचषक स्पर्धेतील न्यूझीलंड संघातला सर्वात लहान खेळाडू रचिन रविंद्रच होता.

rachin post

क्रिकबझ संकेतस्थळावर रचिन रविंद्रचं प्रोफाईल उपलब्ध आहे. तिथल्या माहितीनुसार, रचिन रविंद्रचा जन्म न्यूझीलंडच्या वेलिंग्टनमध्ये झाला आहे. आपल्या अष्टपैलू कामगिरीच्या जोरावर त्यानं देशांतर्गत स्पर्धा, अंडर १९ आणि न्यूझीलंडच्या अ संघात स्थान मिळवलं. न्यूझीलंडकडून तो सप्टेंबर २०२१ मध्ये बांग्लादेशविरुद्ध पहिला टी-२० सामना खेळला.

ईएसपीएन क्रिकइन्फो संकेतस्थळावरील माहितीनुसार, रचिनचे वडील रवी कृष्णमूर्ती पेशानं सॉफ्टवेअर आर्किटेक्ट आहेत. न्यूझीलंडमध्ये स्थायिक होण्यापूर्वी ते बंगळुरुत क्रिकेट खेळले. कृष्णमूर्तींना क्रिकेटची खूप आवड होती. त्यामुळे त्यांनी न्यूझीलंडमध्ये २०११ मध्ये हट हॉक्स क्रिकेट क्लबची स्थापना केली. रचिन गेल्या १२-१३ वर्षांत या क्लबकडून भारतात अनेदा क्रिकेट खेळला आहे. त्याचा रचिनला फायदा झाला. विविध परिस्थितींमध्ये खेळण्याचा लाभ रचिनला झाला. विश्वचषकातील कामगिरीनं हेच दिसून आलं.

रचिन रविंद्रनं विश्वचषकातील पहिलं शतक दक्षिण आफ्रिकेविरुद्ध साजरं केलं. सामन्यानंतरच्या पत्रकार परिषदेत त्यानं भारतावरही भाष्य केलं. ‘माझा जन्म न्यूझीलंडमधला आहे. पण माझं कुटुंब मूळचं भारतातलं आहे. पण मी स्वत:ला पूर्णपणे किवी खेळाडू समजतो. माझी ओळख आणि माझ्या कुटुंबाच्या मुळांचा मला अभिमान आहे,’ असं रविंद्र म्हणाला होता.

रचिन रविंद्रबद्दलची माहिती आणि तथ्यं पाहता त्याबद्दल केला जाणारा दावा खोटा असल्याचं समजतं.



Source link

Leave a Reply

Your email address will not be published. Required fields are marked *